Chaalo dekhan ne baaisaa

तर्ज : धमाल

चालो देखण ने बाईसा, थारो बीरो नाचे रे - चालो देखण ने
बीरो नाचे रे, कि थारो भाई नाचे रे - चालो देखण ने

आ रसियां की टोळी देखो ढोलक चंग बजावे है
घूमर घाले साहिबो यूँ लुळ लुळ नाचे रे - चालो देखण ने
चालो देखण ने बाईसा........

बणकर बीन्द सेवरो बांध्यो, रंग में भरया बाराती रे
मूंछ्यां वाळी बींदणी के सागे नाचे रे - चालो देखण ने
चालो देखण ने बाईसा........

चार तो चंगा की टोल्या बाजारां में बाजे रे
गोखां बैठी गोरड़्या घूँघट से झांके रे - चालो देखण ने
चालो देखण ने बाईसा........


चार तो चंगां की जोड्या बागां में ही बाजे रे
फुलड़ा चुगती गोरड़्या चंगा पर नाचे रे - चालो देखण ने

चालो देखण ने बाईसा, थारो बीरो नाचे रे - चालो देखण ने
बीरो नाचे रे, कि थारो भाई नाचे रे - चालो देखण ने

Aaja mhari phooljhadi malan ki badi me

तान : "मधुवो फूल्यो बाग़ में, भंवरा छेड़े तान 
           फागण आयो गोरडी, आजा मेरी जान "

झटापट आजा म्हारी फूलझड़ी मालण की बाड़ी में 
मालण की बाड़ी में, केसर की क्यारी में 

लाडू और जळेबी ल्यायो - २ 
कि तू तो जीमण के मिस आजा ऐ मालण की बाड़ी में
मालण की बाड़ी में, केसर की क्यारी में 

सतरंगी मैं लहरियो ल्यायो - २ 
कि तू तो ओढण के मिस आजा ऐ मालण की बाड़ी में
मालण की बाड़ी में, केसर की क्यारी में 

थारे खातिर म्हे तो गौरी ढेवतो घड़ायो - २ 
कि तू तो पैरण के मिस आजा ऐ मालण की बाड़ी में
मालण की बाड़ी में, केसर की क्यारी में 

थारी खातिर रंग पिचकारी ल्याओ 
होली खेलण के मिस आज ऐ मालण की बाड़ी में
मालण की बाड़ी में, केसर की क्यारी में 

Ek baar aavo ni jawai ji pawna

१. एक बार आवो नी जवाई जी पावणा
थाने सासु जी बुलावे घर आज, जवाईं लाड करां

२. सासु जी ने मालुम होवे म्हारे भाई आज होयो
म्हारे घरां भी मोकळो काम, सासु जी म्हाने माफ़ करो

३. एक बार आवो नी जवाई जी पावणा
थाने सुसरो जी बुलावे घर आज, जवाईं लाड करां

सुसरो जी मालुम होवे , म्हारो बाप शहर गयो,
म्हारे घरां लारलो काम, सुसरो जी म्हाने माफ़ करो

४. एक बार आवो नी जवाई जी पावणा
थाने बुआ जी बुलावे घर आज, जवाईं लाड करां

बुआ जी ने मालुम होवे, म्हारा भी बुआ जी आया
बुआ सासु जी ने जोड़ू ला मैं हाथ, अबके म्हाने माफ़ करो

५. एक बार आवो नी जवाई जी पावणा
थाने साली जी बुलावे घर आज, जवाईं लाड करां

साली जी ने मालुम होवे, साढू जी ने भेजू हूँ
म्हारा साढू जी नाचे ला सारी रात, साली जी महान माफ़ करां

Mai to paani lene gai mera shyam : Falgun song

मैं तो पाणी लेने गई मेरा श्याम 
मरद चाले अड़-अड़ के 

आ तो कुणसे मरद की है नार 
कि झाला देवे बे-धड़के 

गाल गुलाबी, होठ रसीला, झीणो सुरमो सार 
पाणी भरवा नीसरी , निरख रह्या मोट्यार 
थारी गोरी कलाई पणिहार कि हरी हरी चूड़ी छनके 

आ तो कुणसे मरद की है नार 
कि झाला देवे बे-धड़के

नाजुक बदन म्हारी पतली कमरिया 
सिर पर दो घड़ भारी 
बलम बिना म्हारो फागण सूनो 
मैं जोबण की मारी 
मैं तो परदेशी की नार, मिलण ने मन तरसे 

मैं तो पाणी लेने गई मेरा श्याम 
मरद चाले अड़-अड़ के 

मोरिया आछो बोल्यो रे

मोरिया आछो बोल्यो रे ढळती रात में - २
म्हारे हिवड़े में बहगी रे कटार
मोरिया आछो बोल्यो रे ढळती रात में

डावडी मैं तो बोल्यो रे म्हारी मौज में
थारे किण विध बहगी रे कटार डावडी
मैं तो बोल्यो रे म्हारी मौज में

मोरिया पीहू पीहू की वाणी छोड़ दे
म्हारा पीव जी बसे परदेस मोरिया
पीहू पीहू की वाणी छोड़ दे

डावडी पीहू पीहू की वाणी बोल स्यूं
म्हारे मौज उठे दिन रात डावडी
पीहू पीहू की वाणी बोल स्यूं

मोरिया थारे बागां में काई काई नीपजे
ज्यां में आवे रे, सुगन्धि बास मोरिया
थारे बागां में काई काई नीपजे

मोरनी, म्हारे बागां में मरवो कवडो
जीकी आवे रे, सुगन्धि बास मोरनी
म्हारे बागां में मरवो कवडो

नैणा रा लोभी

अजी हाँ सा म्हारी रुणक झुणक पायल बाजे सा 

नैणा रा लोभी कीकर आऊं सा - २ 

अजी हाँ सा म्हारी सासु सूती है, ननदल जागे सा 

नैणा रा लोभी कीकर आऊं सा - २ 

अजी हाँ सा म्हारी जेठाणी सूती, देवराणी जागे सा 

नैणा रा लोभी कीकर आऊं सा - २

अजी हाँ सा म्हे तो आऊं, कि पाछी फिर फिर जाऊं 

नैणा रा लोभी कीकर आऊं सा - २

अजी हाँ सा म्हारो नानो देवरियो उभो झांके सा 

पडोसन झाला देवे, मैं कईयां आऊं सा 

अजी हाँ सा म्हारी रुणक झुणक पायल बाजे सा 
नैणा रा लोभी कीकर आऊं सा - २ 

कानूड़ा लाल घडलो म्हारो

कानूड़ा लाल घडलो म्हारो भर दे रे - २ 
भर दे, ऊंचा दे, सर पर धर दे रे - २ 
कानूड़ा लाल घडलो म्हारो भर दे रे

तू मत जाणी कान्हा, आई मैं अकेली 
सात सहेलियां म्हारे संग छे रे 
कानूड़ा लाल घडलो म्हारो भर दे रे

तू मत जाणी कान्हा, दूर गाँव की 
बरसाने म्हारो घर छे रे 
कानूड़ा लाल घडलो म्हारो भर दे रे

तू मत जाणी कान्हा, अकन कंवारी 
श्री कृष्ण म्हारो वर छे रे 
कानूड़ा लाल घडलो म्हारो भर दे रे

कानूड़ा लाल घडलो म्हारो भर दे रे - २ 
भर दे, ऊंचा दे, सर पर धर दे रे - २ 
कानूड़ा लाल घडलो म्हारो भर दे रे

कागलिया गेरो गेरो बोले

कागलिया, गेरो गेरो बोले नी रे - २ 
म्हारो परवानो बातलियो परदेस 
परदेसिड़ा ओलु थारी आवेनी रे 

कागलिया बाग़ तो लगा दियो रे - २ 
म्हारा बागां में घुमणियो परदेस 
परदेसिड़ा ओलु थारी आवेनी रे

कागलिया, हौद तो बनाय लिया रे 
म्हारा होदां में नहावणीयो परदेस 
परदेसिड़ा ओलु थारी आवेनी रे

कागलिया, महल तो बणा दिया रे 
म्हारा महलां में सोवणीयो परदेस 
परदेसिड़ा ओलु थारी आवेनी रे

पोस्टमैन

ओ दे गयो कागद पोस्टमैन, म्हारा पीव घर आसी जी
आ शरद पूनम की रात चांदनी रंग बरसा सी जी

पतला पतला फलका पोस्यूँ, उजळी रान्धू खीर - २
आँगन बैठ जिमास्यूं म्हारी नणदल बाई रो बीर
म्हारे मन री बात सुणास्यूं जद म्हाने गले लगासी जी
आ शरद पूनम की रात चांदनी रंग बरसा सी जी

काजल टीकी लगाके करस्यूँ मैं सोळा सिणगार - २
बाट जोवते आंख्यां थकगी कद आसी भरतार
म्हारा मेहँदी राच्या हाथ सजन ने घणा सुहासी जी
आ शरद पूनम की रात चांदनी रंग बरसा सी जी

सावन बीते फागण जावे, बीता तीज त्यौहार - २ 
घणी अडिकी जद यो आयो मिलबा को त्यौहार 
ओ रंगां को त्यौहार सजन म्हारे रंग रंग जासी जी 
आ शरद पूनम की रात चांदनी रंग बरसा सी जी

जळ जमना रो

जळ जमना रो पाणी कइया ल्याऊं ओ रसिया
पतली कमर म्हारी लुळ लुळ जाय - २

छोटोड़ी नणद म्हारी पाणी कोणी लावे
बां घरां बैठी हुकम चलावे ओ रसिया
पतली कमर म्हारी लुळ लुळ जाय - २

सर पर घड़लो घड़े पर मटकी
मटकी ऊपर कलसो कोनी चाले ओ रसिया
पतली कमर म्हारी लुळ लुळ जाय - २

ऊँची ऊँची पाळ घड़ो कोनी डूबे
बीच में जाऊं तो डर लागे ओ रसिया
पतली कमर म्हारी लुळ लुळ जाय - २

चाँद चढ्यो गिगनार

चाँद चढ्यो गिगनार किरप्या, ढल आई आधी रात पीव जी 
अब तो घरां पधार, मारुणी थारी बिलखे छे जी बिलखे छे 

हाथां मेहँदी राचणी कोई, नैणा काजल सारयो जी 
ले दिवलो चढ़गी चौबारे, मरुवन पलंग संवारयो जी 
बैठी मनड़ो गौरी का, आया नहीं भरतार 
मारुणी थारी बिलखे छे जी बिलखे छे

ज्यूँ ज्यूँ तेल बले दिवले में, धण बाती सरकावे जी 
नहीं आयो मद चखियो रसियो, दिवलो नाड़ हिलावे जी 
दिवले सूं झुँझलाय गौरी, दिवलो दियो बुझाय 
मारुणी थारी बिलखे छे जी बिलखे छे

सिसक सिसक कर गौरी रोवे, तकियों काळो करियो जी 
उगते सूरज रसियो आयो, हाथ पीठ पर धरियो जी 
कठे बिताई सारी रात थाने, उग आयो प्रभात 
मारुणी थारी बिलखे छे जी बिलखे छे

हाथ छिटक कर गौरी बोली, अब क्यों घरां पधारया जी 
सौतन के संग रात बिताई, कर कर कोढ़ सवाया जी 
कठे बिताई सारी रात थे तो कर दी नी परभात 
मारुणी थारी बिलखे छे जी बिलखे छे

ऊक चूक मत बोलो गौरी, मत ना देवो ताना जी 
साथीड़ां संग रात बिताई, खेल्या चोपड़ पासा जी,
बठे बिताई सारी रात म्हाने, उग आयो परभात 
गौरी मुस्काओ जी मुस्काओ जी 

चंदो गयो सिधार देखो, उग आयो परभात 
म्हारा अब आया भरतार, मनड़ो मुळके छे जी मुळके 

पल्लो लटके

पल्लो लटके रे म्हारो, पल्लो लटके - २ 
जरा सो - ३, टेढ़ो हो जा बालमा म्हारो पल्लो लटके 

पल्लो लटके गौरी रो, पल्लो लटके - २ 
ज़रा सो - ३, ऊंचो ले ले गौरी पल्लो भीग जावे लो 

लाल मंगायो पोमचो जी, हरी लगाई कोर - २ 
अंगिया रेसम काटके, देदी दादर पे मोर 
जरा सो - ३, टेढ़ो हो जा बालमा म्हारो पल्लो लटके 

घूँघट में बिजल्यां चमकावे गौरी थारी आँख - २ 
मत जोबन में आंधी हो री निचे ने तो झाँक 
ज़रा सो - ३, ऊंचो ले ले गौरी पल्लो भीग जावे लो

लहंगों घेर घुमेर म्हारी चुनड़ गोटेदार - २
छम छम करती चालूं म्हारे पल्ले ने फटकार 
जरा सो - ३, टेढ़ो हो जा बालमा म्हारो पल्लो लटके

सौ मोहरा की अंगिया थारी, लाख मोहर को लहंगो - २
ज्यादा ऊंचो मत कर लीजे नहीं पड़ेगो महँगो 
ज़रा सो - ३, ऊंचो ले ले गौरी पल्लो भीग जावे लो

बालम छोटो सो

सात बरस को मेघूड़ो - २
छब्बीसों ढल रही नार, बालम छोटो सो
छोटो तो मोटो गौरी मत ना करो - २
कोई राख मरद री लाज, मोटो होई जासी

बाजारां में जातां ढोलो हठ पकड्यो - २
म्हाने झुणझुणीयो दिला दे घरनार बालम छोटो सो

झुणझुणीयो दिलासी थारा मायर बाप - २
म्हारी काया मत बालो भरतार जाता बालम छोटो सो

हलवायां के जातां ढोलो हठ पकड्यो - २
म्हाने लाडुडो दिला दे घरनार बालम छोटो सो

लाडूडो दिलासी थारा मायर बाप - २
म्हाने लाजां मत मारो भरतार बालम छोटो सो

खातीडे के जाते जातां ढोलो हठ पकड्यो - २
म्हाने गाडुलो दिला दे घरनार बालम छोटो सो

गाडूलो दिलासी थारा मायर बाप - २
म्हारी छाती मत बालो भरतार बालम छोटो सो

महलां में जातां ढोलो हठ पकड्यो - २
म्हाने गोद'या में उठा ले घरनार बालम छोटो सो

आछी रे परणाई म्हारा मायर बाप - २
म्हारो जोबन ऐड़ो जाय बालम छोटो सो

चाल चंदा डागलिये

चाल चंदा डागलिये पे, झीणी झीणी चांदनी - २ 
कोई हिल मिल रास रचावां ऐ फागण में 
थारे सागे कोनी चालूं, ओ रे बालम रसिया - २ 
थे सारी सारी रात जगावो जी फागण में 

थारे थारे खातर ढोला बाग़ लगायो जी 
कोई घुमण के मिस आवो जी फागण में 
चाल चंदा डागलिये पे.......

थारे थारे खातर ढोला थाळ सजायो जी 
कोई जीमण के मिस आज्यो जी फागण में 
चाल चंदा डागलिये पे.......

थारे थारे खातर ढोला सेज बिछायो जी 
कोई ओढन रे मिस आवो जी फागण में 
चाल चंदा डागलिये पे.......

थारे थारे खातर ढोला सज सिंगारी जी 
कोई निरखण के मिस आज्यो जी फागण में 
चाल चंदा डागलिये पे.......
आपां प्रीत रंग, रंग जास्या ऐ फागण में 

बाई सा रा बीरा

बाई सा रा बीरा, जयपुर जायजो जी 
आता तो लायजो, तारां री चुन्दडी  

सुन्दर गौरी पोत बतावो जी - २ 
कसिक ल्यावां तारां री चुन्दडी 

बाई सा रा बीरा, हरा हरा पल्ला जी - २ 
कसुमल रंग की तारां री चुन्दडी 

म्हारा मिरगा नैणी ओढ़ बतावो जी - २ 
कसिक सोवे तारां री चुन्दडी 

बाई सा रा बीरा, ननद हठीली जी - २ 
ओढ़न नहीं दे तारां री चुन्दडी 

म्हारा चंदा बदनी ओढ़ बतावो जी 
महलां में निरखां जाली री चुन्दडी 

Dharti Dhora Rii

आ धरती गोरा धोरां री
आ धरती मीठा बोरां री
ई धरती रो रुतबो ऊँचो
आ बात केवे कूंचो कूंचो 

आ तो सरगां ने सरमावे, ई पर देव रमण ने आवे
ई'रो जस नर नारी गावे, धरती धोरां री - 2

सूरज कण कण ने चमकावे - २
चंदो इमरत रस बरसावे
तारा निछरावल कर जावे, धरती धोरां री
काळा बादलिया घहरावे
बिरखा घुघरिया घमकावे  
बिजली डरती ओला खावे, धरती धोरां री

लुळ लुळ बाजरियो लहरावे 
मक्की झा'लो देर बुलावे 
कुदरत दोन्यू हाथ लुटावे, धरती धोरां री
पंछी मधरा मधरा बोले 
मिसरी मीठे सुर स्यूं घोळे, 
झीणो बायरियो पंपोळे, धरती धोरां री

ई'रो चित्तोड़ो गढ़ लूंठो 
ओ तो रणवीरां रो खूंटो 
ई रे जोधाणु नौ कुंटो, धरती धोरां री
जयपुर नगरियाँ री पटरानी 
कोटा बूंदी कद अंजाणी
चम्बल केवे आ'री कहानी, धरती धोरां री

ई पर तनड़ो मनड़ो वारां 
ई पर जीवन प्राण उवारां 
इ'रि ध्वजा उड़े गिगनारा, धरती धोरां री
ई'री सच री आन निभावां 
ई'रे पथ ने नहीं लजावां 
ई'ने माथो भेंट चढ़ावां, धरती धोरां री

आ तो सरगां ने सरमावे, ई पर देव रमण ने आवे
ई'रो जस नर नारी गावे, धरती धोरां री - 2

और रंग दे

और रंग दे रे म्हाने ओजू रंग दे
म्हारा सासु जी के दाय कोनी आई रे नीलगर और रंग दे

अल्ला पल्ला पे दादर मोर रंग दे
घूँघट पर बाईसा रो बीरो रे, नीलगर और रंग दे 

सुसरो जी रंगाई म्हारे लाल ओढ़नी
म्हारा सासुजी के दाय कोनी आई रे नीलगर और रंग दे

जेठजी रंगायो म्हारे पीळो कोमचो
म्हारा जेठानी के दाय कोनी आई रे नीलगर और रंग दे

देवरियो रंगाई म्हारे लाल चुनड़ी
म्हारा सायब जी के दाय कोनी आई रे नीलगर और रंग दे

मिसरी को बाग़ लगा दे रसिया

मिसरी को बाग़ लगा दे रसिया
नीम की निम्बोली म्हाने खारी लागे
खारी लागे म्हाने खारी लागे
नीम की निम्बोली म्हाने खारी लागे

रंग रंगीला म्हारा साहेब थे तो
थांकी सांवली सूरत मतवाली लागे
नीम की निम्बोली म्हाने खारी लागे

सामली पड़ौसन तीखो सुरमो सारे
ठुमका करती छम छम चाले
बा तो फुट्योड़ी सी म्हाने इक झारी लागे
उजड़ी सी म्हाने इक क्यारी लागे
मिसरी को बाग़ लगा दे रसिया
नीम की निम्बोली म्हाने खारी लागे

थे भी तो बीने लुक छिप ताको
खिड़की खोलो झुक झुक ताको
म्हाने सामली पड़ोसन कामणकारी लागे
नीम की निम्बोली म्हाने खारी लागे

म्हे साहेब थाने लागूं हूँ पुराणी
इसी बातां मत कर सुण ले ऐ स्याणी
तू तो म्हाने रूप की धिराणी लागे
प्यारी प्यारी म्हारी घरआली लागे
मिसरी को बाग़ लगासा गोरिये,
नीम की निम्बोली थाने खारी लागे,

मिसरी को बाग़ लगा दे रसिया
नीम की निम्बोली म्हाने खारी लागे

कठे सूं आई सूंठ

कठे सूं आई सूंठ, कठे सूं आयो जीरो
कठे से आयो रे, भोली बाई थारो बीरो

जयपुर से आई सूंठ, दिल्ली से आयो जीरो
कलकत्ते से आयो, प्यारी भाबद म्हारो बीरो

या क्या में आई सूंठ, काहे में आयो जीरो
काहे में आयो रे भोली बाई थारो बीरो

गाड़ी में आई सूंठ, ऊँटा से आयो जीरो
रैलां में आयो प्यारी भाबद म्हारो बीरो

खिंड गई सूंठ बिखर गयो जीरो
ओ रूठ गयो ऐ प्यारी भाबद म्हारो बीरो

मैं चुग लेसा सूंठ पछाड़ लेस्या जीरो
मनाय लेस्या ए भोली भाई थारो बीरो

काहे में चाहे सूंठ, काहे में चाहे जीरो
काहे में चाहीजे प्यारी भाबद म्हारो बीरो

जापे में चाहे सूंठ, रसोया चाहे जीरो
महलां में चाहिजे भोली भाई थारो बीरो
सेजां पे चाहिजे भोली भाई थारो बीरो

भर जोबन में नाव डूबगी

भर जोबन में नाव डूबगी, तैरा दे लणीहारा
तेरे नाम की दो चूड़ी म्हने, पैरा दे मणिहारा

पटरी पटरी रेल चलत है, ऊपर जहाज हवाई
फागण में दो छैला मरग्या, कर कर याद लुगाई

नीम का जोबन नीम निमोली, आम का जोबन सुआ
मर्द का जोबन पान सुपारी, पणिहारी का कुआ

आधी रात ने आयो देवर, लायो फूल गुलाबी
झाला देय बुलावण लाग्यो, आजा मेरी भाभी

सुण रे पति म्हारा सुण रे पति, थने हाल बताऊँ सारा
देवरिये रा ब्यांव करा दे, कोन्या फिरे कुंवारा

नैणा नीचा कर ले

तर्ज : धमाल 

नैणा नीचा कर ले श्याम से मिलावेली काई, नैणा नीचा कर ले
नैणा नीचा कर ले श्याम से मिलावेली काई, नैणा नीचा कर ले

तीखे तीखे नैना में झीणो झीणो कजरो
हाय राधे, नैणा सूं नैन मिलावेली काई
नैणा नीचा कर ले श्याम से मिलावेली काई, नैणा नीचा कर ले

गोरी गोरी बैयाँ में हरी हरी चूड़ियाँ
हाय राधे, श्याम मिलन ने जावेली काई
नैणा नीचा कर ले श्याम से मिलावेली काई, नैणा नीचा कर ले

गोरी गोरी हथेलियाँ में रच रही मेहंदी
हाय राधे, झालो देर बुलावेली काई
नैणा नीचा कर ले श्याम से मिलावेली काई, नैणा नीचा कर ले

गोरी गोरी पग्लियां में बज रही पायल
हाय राधे, नाच नाच के रिझावेली काई
नैणा नीचा कर ले श्याम से मिलावेली काई, नैणा नीचा कर ले

रंग मत डारे रे कानूड़ा

तर्ज : धमाल 

रंग मत डारे रे कानूड़ा म्हारो गुज्जर मारे रे
मैं गुज्जरी नादान ओ गुज्जर मतवालो रे
रंग मत डारे रे कानूड़ा म्हारो गुज्जर मारे रे

होली खेले तो कान्हा बरसाने में आज्यो रे
राधा और रूख्मण ने आता सागे लाइजो रे
रंग मत डारे रे कानूड़ा म्हारो गुज्जर मारे रे

घर मत आज्यो म्हारी सास बुरी है
नन्दोली नादान म्हाने बोल्या मारे रे
रंग मत डारे रे कानूड़ा म्हारो गुज्जर मारे रे

सास बुरी है म्हारी ननद हठीली
परण्यो बेईमान म्हाने गाल्यां काढ़े रे
रंग मत डारे रे कानूड़ा म्हारो गुज्जर मारे रे

चन्द्र सखी भज बाल कृष्ण छवि
हरी चरनन में म्हारो चित लागे रे
रंग मत डारे रे कानूड़ा म्हारो गुज्जर मारे रे

Fagan Me Pyara Laage

फागण में प्यारा लागो ओजी म्हारी लाल नणद रा बीर
लाल नणद रा बीर म्हारी छोटी नणद रा बीर
फागण में प्यारा लागो ओजी म्हारी लाल नणद रा बीर

राधा के संग होली खेले कृष्ण कन्हैयो फाग में
छम छम करती राधा नाचे बाँसुरिया की राग में
फागण में चंग बजावे ओजी म्हारी नणदल बाई रा बीर

कोई चंग बजावे कोई लुळ लुळ घूमर घाले
फगनिये को मस्त महीनो झिणो बायरो चाले
फागण में हंस बतलावे  ओजी म्हारी नणदल बाई रा बीर

गोरो गोरो मुखड़ो म्हे तो घूँघट में छुपाऊँगी
ले पिचकारी आग्या पीवजी गोरो बदन लुकाऊँगी
गाला पर रंग लगावे ओजी म्हारी नणदल बाई रा बीर

*************************************************************************