बालम छोटो सो

सात बरस को मेघूड़ो - २
छब्बीसों ढल रही नार, बालम छोटो सो
छोटो तो मोटो गौरी मत ना करो - २
कोई राख मरद री लाज, मोटो होई जासी

बाजारां में जातां ढोलो हठ पकड्यो - २
म्हाने झुणझुणीयो दिला दे घरनार बालम छोटो सो

झुणझुणीयो दिलासी थारा मायर बाप - २
म्हारी काया मत बालो भरतार जाता बालम छोटो सो

हलवायां के जातां ढोलो हठ पकड्यो - २
म्हाने लाडुडो दिला दे घरनार बालम छोटो सो

लाडूडो दिलासी थारा मायर बाप - २
म्हाने लाजां मत मारो भरतार बालम छोटो सो

खातीडे के जाते जातां ढोलो हठ पकड्यो - २
म्हाने गाडुलो दिला दे घरनार बालम छोटो सो

गाडूलो दिलासी थारा मायर बाप - २
म्हारी छाती मत बालो भरतार बालम छोटो सो

महलां में जातां ढोलो हठ पकड्यो - २
म्हाने गोद'या में उठा ले घरनार बालम छोटो सो

आछी रे परणाई म्हारा मायर बाप - २
म्हारो जोबन ऐड़ो जाय बालम छोटो सो