चाल चंदा डागलिये विडिओ

Kuve Par Aekli

घड़लो, घड़े पर टोकनी ऐ
ऐ माई मेरी गई गई समद तळाब
कुवे पर ऐकली ऐ - २

घड़लो तो डूबे ना टोकनी ऐ
ऐ माई मेरी इंडुनी तो तिर तिर जाए
कुवे पर ऐकली ऐ - २

नणद भोजाई पाणी नीसरी ऐ
ऐ माई मेरी गई गई समद तळाब
कुवे पर ऐकली ऐ - २

भोजाई भर पाछी बावड़ी ऐ
ऐ माई मेरी नन्दोली ने मिल गयो श्याम
कुवे पर ऐकली ऐ - २

रात घणी अण-खावणी ऐ
छैला म्हारो परणियो बसे परदेस
कुवे पर ऐकली ऐ - २

Umrao : Super Hit Rajasthani Song

उमराव थारी सूरत प्यारी लागे म्हारा राव 
उमराव जी ओ जी उमराव - २ 
उमराव थारी बोली मीठी लागे म्हारा राव 
उमराव जी ओ जी उमराव - २ 

आप झरोखे बैठिया अलबेला सरदार 
हाजर रेवे गोरडी कर सोळा सिणगार 
ओ जी उमराव थारी बोली मीठी लागे म्हारा राव 
उमराव जी ओ जी उमराव - २ 

चार कूट की बावड़ी ज्यां में शीतल नीर 
आपां रळ मिल न्हावसां नणदल बाई रा बीर 
उमराव थारी संगत प्यारी लागे म्हारा राव 
उमराव जी ओ जी उमराव - २ 

चांदी को इक बाटको, ज्यां में भरिया भात 

हुकुम देवो सरकार थे, जीमां दोन्यां साथ 

ओ जी सिरकार थाने पंखियों ढुलाऊँ म्हारा राव 

उमराव जी ओ जी उमराव - २  

पिव आया परदेस से जाजम देइ बिछाय 

तन मन की फिर पुछस्यां हिवड़े ल्यो लिपटाय 

ओ जी हुकुम करो तो धन थारी हाजर है म्हारा राव 

उमराव जी ओ जी उमराव 

Nakhralo Devariyo

नखराळो देवरियो भाभी पर जादू कर ग्यो 
नखराळो देवरियो भाभी पर जादू कर ग्यो 

रंग रंगीलो छेल छबीलो देवरियो है म्हारो 

मिठो मिठो मुल्कन लागे बोले प्यारो प्यारो 

कामण-गारो देवरियो भाभी पर कामण कर ग्यो 

चंदा जैसी चम्क्योड़ी मैं लाऊंगी देवराणी हो 

थे हो म्हारा प्यार देवर बा म्हारी देवरानी हो 

जादूगारो देवरियो भाभी के चित चढ़ ग्यो 

खूब मिलेगी जोड़ी थारी, थे राजा बा राणी हो 

म्हारी भी जोड़ी मिल जासी देवरानी जेठानी 

सैलानी देवरियो भाभी पर जादू कर ग्यो 

Badan Mharo Najuk

" सासु बोली बिंदनी, तू पानी भरबा जाय 
  दो घड़ा दूँ शीश पे, म्हारी पतली कमर लुळ जाय "

बदन म्हारो नाजुक, घड़ले में बोझ भारी 
म्हे हलवा हलवा चालूं ऐ, दरद की मारी 
दरद की मारी - २ , मैं धीमे धीमे चालूं दरद की मारी 

 " चुड़लो लाया पिंवजी, तो पैरयो कलाई मांय 
   खन खन बाजे चुड़लो, मन मेरो मुसकाय "

पर कुंचो म्हारो पतलो , चुडले में बोझ भारी 
म्हे हलवा हलवा चालूं ऐ, दरद की मारी 
दरद की मारी - २ , मैं धीमे धीमे चालूं दरद की मारी

  " सुसरो जी सोजत गया, तो मेहँदी दीनी ल्याय 
    हाथ्यां मेहँदी राचणी, म्हारी सासु सुगन मनाय "

म्हाने मेहंदी लागे प्यारी, माने ना सासु म्हारी 
फीकी पड़ जावे मेहन्दी, मैं विनती कर कर हारी 
माने ना सासु म्हारी, मैं विनती कर कर हारी 

Cham cham chamke chundri

चम चम चमके चुनड़ी बिणजारा रे
कोई थोड़ो- २ , म्हारे सामों झांक रे बिणजारा रे

म्हारी तो रंग दे चुंदड़ी बिणजारा रे
म्हारे साहिबां रो- म्हारे पिंवजी रो
म्हारे साहिबां रो रंग दे रुमाल रे बिणजारा रे

जोधाणा सरीखा शहर में बिणजारा रे
कोई सोनो तो - २ , कोई सोनो तो घड़े सुनार रे

पायल घड़ दे बाजणी बिणजारा रे
म्हारी नथली - २ , म्हारी नथली पलकादार रे बिणजारा रे

चम चम चमके चुनड़ी बिणजारा रे
कोई थोड़ो- २ , म्हारे सामों झांक रे बिणजारा रे

Ghoomar Title Song

ओ म्हारी घूमर छे नखराळी ऐ माँ,
घूमर रमवा म्हे ज्यासां ओ राजोरी घुमर रमवा म्हे ज्यासां

ओ म्हाने रमता ने काजळ टीकी ल्यादो ऐ माँ
घूमर रमवा म्हे ज्यासां ओ राजोरी घुमर रमवा म्हे ज्यासां

ओ म्हाने रमता ने लाडूड़ो ल्यादो ऐ माँ
घूमर रमवा म्हे ज्यासां ओ राजोरी घुमर रमवा म्हे ज्यासां

ओ म्हाने परदेस्यां मत दीजो ऐ माँ
घूमर रमवा म्हे ज्यासां ओ राजोरी घुमर रमवा म्हे ज्यासां

ओ म्हाने राठौड़ां रे घर भल दीज्यो ऐ माँ
घूमर रमवा म्हे ज्यासां ओ राजोरी घुमर रमवा म्हे ज्यासां

ओ म्हाने राठौड़ां री बोली प्यारी लागे ऐ माँ
घूमर रमवा म्हे ज्यासां ओ राजोरी घुमर रमवा म्हे ज्यासां